陳曉琳

作為跳繩運動員，我嘅目標由挑戰本地比賽，一直慢慢推進至挑戰世界賽。一直想進步、尋求突破，但即使努力訓練後仍未突破樽頸位。識左Sammy之後就發現原來要進步唔係只靠一味Train Hard 而係要Train Smart。

跳躍喺跳繩入面尤其重要，但係自己跳左咁多年繩先發現原來冇好好學習過點起跳。有別於坊間其他注重肌力、爆發力嘅重量訓練模式，Sammy針對嘅係跳躍動作嘅細節，由儲力、發力至落地每個細項逐一改善。即使無特別接受重量訓練，我而家嘅跳躍能力已經大大改善。

Sammy嘅動作分析仔細，即使係花式跳繩呢類比較少人了解嘅項目，佢都能夠準確指出各花式動作嘅發力位置。仔細嘅程度，甚至比運動員自己觀察得更入微，令我都會不斷思考自己嘅動作要點拆解、點完成。跟隨佢訓練嘅過程係一個又一個problem-solving 嘅環節：觀察我嘅動作、指出問題所在、再為特定動作進行訓練解決問題，甚至會同我一齊分析其他運動員嘅影片。喺呢度搵到問題及練習方向後，我又會將呢啲知識帶返去同自己嘅跳繩教練再改進。佢嘅訓練比左個新嘅角度我去拆解跳繩嘅動作，亦提供左啲新嘅練習方向比我去提升自己。

所謂有質素嘅訓練，並唔係不斷重複錯誤嘅技巧，強迫自己嘅身體完成動作。而係針對問題調整身體，並以正確嘅姿勢喺能夠發力嘅情況下完成。跳繩運動對關節負荷大，所以包括我在內，唔少運動員長年累月訓練後都會受到傷患影響。好感激經歷傷患後遇上Sammy，當學習過正確嘅發力方法以及跳躍技巧後，身體嘅傷患已經明顯減少。最重要嘅係自己嘅跳繩表現都有好大嘅進步，可以更好咁控制自己身體，亦都對自己嘅身體及各花式動作有更深入嘅認識。