《隨筆：關於學習的思考》
如果follow我一段時間的朋友，都知道我係covid前曾經去過好多地方，上過好多不同嘅課程。
當時儲左好多知識，但唔算對所有知識都有深入嘅理解。
直到最近幾個月因為健身室關閉，又多左時間，所以花時間重溫一啲我早前學過但唔算太了解嘅課程內容。
事隔幾年，我嘅知識儲備當然進步好多，所以係理解知識上嘅能力都高左好多。
我個人認為，要提高知識嘅理解能力有兩個方法。
—
第一，就係要學多啲。
知識就好似網狀結構，我地學習新知識係需要根據已有知識去理解，從已有嘅節點連接去新嘅節點。
如果新學嘅知識距離你已有嘅知識水平太遠，就連結唔到出去，學完都好似聽故事一樣。即係如果你同一個啱啱識鑽木取火嘅人講電燈嘅原理，佢應該唔知你講咩。
所以當你嘅知識量足夠高，本身嘅「知識網」足夠大嘅時候，你上一個課堂嘅時候就比較容易理解，因為同你本身嘅知識網有較多嘅重疊，並且可以比起一個根基比較淺知識量比較少嘅人理解得更多。
用一個專業啲嘅字眼叫做馬太效應。
就好似我同一個初入行嘅教練去上同一個課程，我能夠理解到嘅概念應該會比該位教練更多。知識係需要花時間累積嘅，急唔黎，但只要持續累積，會越黎越好。
—
另一個做法就係實踐。
input學新知識係一個相對被動嘅事情，只有process過後再output先可以更加令到知識內化。Process嘅過程就係將新知識同已有知識碰撞嘅過程，然後用屬於自己嘅應用方法output出黎。
係process 同output嘅過程我地會遇到好多困難，到實際應用先會發現我地對某啲概念理解其實唔夠清晰。但呢個解決問題嘅過程同經驗先係可以令我地將知識內化同融會貫通嘅，並且應用係不同嘅情況。
上堂係一個相對簡單嘅process，思考同內化先係整個學習過程最痛苦嘅一環，但捱過左後就可以享受到知識嘅果實。
而且知識越內化，網狀結構嘅節點越深刻，就越容易同新知識建立連結，學習過程都唔會咁痛苦。
—
過往兩年都多左唔少訓練師開始進修不同嘅課程，但如果唔想浪費錢，就記得要多啲運用，先可以增加自己嘅理解。
係唔明朗嘅環境，就係比較大家嘅能力同適應能力，而知識量嘅儲備亦都係決定性嘅因素。希望大家可以趁呢個機會好好回憶一下學過嘅知識或者學習更多新嘅知識，並且真正運用落實際情況啦。
Comments