係健身室用自由重量做負重訓練，正常不過。但如果問起點解要做負重訓練，大家應該會直接回答因為想增加強度，刺激肌肉，達到肌肥大效果。
呢個係非常合理的答案，但卻唔應該係唯一正確的答案。訓練身體嘅活動能力，令到身體更具功能性，都係一個負重訓練嘅原因。
好多人係健身室都聲稱做功能性訓練，但功能性嘅點係邊度呢？（無可否認肌肉夠大外表夠吸引都好功能）
如果想身體更具功能性，訓練嘅目標應該係教導肌肉係理想嘅時機按照理想嘅順序出力，咁樣就可以改善動作效率。
用人話來講，即係更協調。
理想情況，就係教練用口講，然後學員就能夠調整，改善動作。
但理想好美好，現實好骨感。如果想做就做到的話，大家訓練同教學時就唔會咁痛苦。
就係因為咁難控制，所以需要外力協助。透過改變外在環境，逼使身體改變發力模式。
----
例如槓鈴深蹲barbell back squat大家都經常做，但如果做back squat 做得唔好時，退階動作就係高腳杯深蹲 goblet squat，但點解會做呢個動作？
goblet squat 同back squat最大嘅分別就係前者重量係身體前側，後者重量係身體後側。
當重量係身體前側時，身體重心就可以稍微靠後，較為容易用到後側肌肉（膕繩肌、臀部肌肉）。同時，雙手係前側負重，能夠避免肋骨外翻，核心較容易發力。
呢個就係透過重量嘅位置，為身體嘅活動設立限制（constraints），令到身體只能依照特定方式去運作。
學員身體習慣呢種發力方式後，就有更大機會係做槓鈴深蹲時都可以控制盤骨同肋骨嘅位置，做到更為穩定嘅深蹲。
呢種方式其實非常常見。例如係練衝刺跑時係頸後攞住木棍，確保身體挺直同減少手臂動作，比下肢有更好嘅發力角度。
或者係用阻力帶綁係盤骨位置，令到向前移動時係用臀部力量向前推進而唔係單純用小腿同四頭肌。
又或者用阻力帶係前側綁住支barbell，然後教練要求做deadlift時barbell要貼住大腿與脛骨，去逼使背闊肌用力對抗往前嘅拉力。
透過外在因素令學員係動作期間得到即時嘅feedback，比起一直用手用力去「調整」學員嘅身體動作更好，因為一出問題學員就會感受得到，效果亦都更持久。
-------
工具只係輔助，當你了解大原則，知道訓練目標，用好多不同工具都可以達到訓練效果。
提高訓練強度係重要，提高身體力量係重要，但教導身體更有效率地發力去對抗外力都同樣重要。
除左「辛苦地訓練」之外，訓練呢個專業仲有好多可能性可以去發掘。
Bình luận