如果要將我嘅學習過程總結，可以簡單分類為3個範疇，分別為知識、技能同態度。
知識
知識係已經被發現和驗證的規律，係確定的，唔需要自己再去慢慢試錯然後再證實，再恍然大悟。
例如 E=mc^2、牛頓定律等等，你唔需要重新去證明，有需要時直接攞去用就可以。
如果知識可以量化，我人生中最有知識嘅時期，唔洗講一定係我考A-level考試嘅時候，其次先係宜家。
但係，知識係有保鮮期同適用邊界的。基本上如果你日常生活唔需要用到的話，學完就會唔記得左。A-level時期嘅物理、數學知識基本上忘記得7788，取而代之嘅就係人體解剖學、肌肉動力學、生理學、運動員訓練相關知識。
隨住工作性質改變，面對嘅目標群體唔同，要求不停提高，就需要不停學習。將知識推陳出新，或者以新知識同舊有知識不停進行碰撞，產生對知識嘅新理解。呢啲都係學習嘅一部分。
技能
除左學習知識之外，學習技能亦都同樣重要，甚至乎更加重要。
知識停留係理論層面，技能就係應用層面。
你知道plyometric training對於訓練彈跳同爆發力非常重要，你非常了解生理學同肌肉動力學嘅原理，但你都係需要親自去多次練習，先可以做到出黎。
你知道全呼吸好重要，知道橫隔膜同盤底肌同深層核心需要同時移動先可以做到全呼吸，但都係需要自己親自練，先可以感受到不同擺位之下人體嘅變化，感受到核心同時擴張同時收縮嘅感覺。
你知道肩胛骨控制好重要，知道四足跪姿係一個訓練肩胛骨穩定性嘅好方法，但都要花時間去練，先可以真正做到好嘅示範等學生跟住黎做。
當然，仲有各種教學相關技能，例如觀察學生動作嘅技能，溝通技能等等，都係需要練習。
簡單而言，要得到技能，唔可以單靠「學」，而係需要靠「練習」返黎。透過經驗嘅累積同不停嘅trial & error，先可以變成屬於你嘅東西。
態度
態度係一個比較空泛嘅概念，可以理解為幫助你睇世界嘅嗰副有色眼睛。
你有一定嘅知識同技術之後，但你仲會唔會繼續學、學邊個範疇、幾用心學、幾用心去練，其實都係取決於你嘅態度。
如果你覺得自己係good enough，top of your field，咁自然就會滿足於現有嘅地位，同時抗拒學習新事物。
如果你覺得自己係遠遠未夠的話，就自然會選擇繼續努力學。
態度係好難從外在改變，只能從內心出發先可以改變。
好難用道理去說服，但可以透過以身作則去令其他人感受到分別。
我亦都係因為見識過外國老師嘅知識紮實嘅程度同埋真正長期不停學習嘅做法，先做到不停學習。當水平高過自己嘅人都不停學習的時候，自己又點可以聽落黎呢。
態度決定一切。
——
用腦去學、用身體去習、用心去做，就係過往學習過程嘅總結。
Comments