訓練需要取捨 - 談訓練計劃的安排

經濟學上有個概念叫做「機會成本」，大概意思就係假如你眼前有A&B兩個個選項，當你選擇做A嘅時候，你無選擇的事情，即係B，都會變左你下決定的成本。通俗講法，就係魚與熊掌不可兼得。

機會成本概念係生活大小事都會遇到，係訓練上都會遇到。

即使係全職運動員，由於專項訓練上都已經佔據左大量嘅時間，可以投放係體能訓練上嘅時間都有限。更何況本身嘅精力有限，無可能係訓練後仲要進行一課兩小時嘅體能訓練，或者做10個訓練動作。

咁樣係偏離現實嘅訓練安排。

所以教練嘅重要職責，就係同運動員溝通，同佢哋一齊決定點樣做出取捨，訓練上應該專注係邊樣特點。主要考慮三個問題：

1. 要達成運動表現上嘅目標，邊一個特質最重要？（速度、力量、爆發力、重心轉移、盤骨穩定、離心能力，諸如此類）

2. 運動員邊一個特質最弱？改善左會帶黎最明顯嘅改變？

3. 有邊一樣會暫時放棄/減少訓練？

透過回答呢三個問題，我地就可以有針對性地安排訓練課表同埋挑選訓練動作。每一個訓練週期，可能係3/4/6個星期不等，都應該係針對性地提升某啲訓練特質，在用比較少嘅訓練量去維持其他特質嘅能力，以此黎為運動員提升。

所謂針對性地提升某啲訓練特質，可以係訓練量上嘅多少，或者係訓練強度上嘅多少，更重要係需要consistent。係週期完結後回望，將所有做過嘅訓練綜合一齊，會見到個目標係想提升某個特質。

運動員都係人，唔係機械人，無可能做10個動作並且10個都維持高強度高質量。另外，運動員更需要考慮回復嘅因素，recovery不足，身體長期處於發炎狀態，都會影響身體嘅恢復，更加難維持高質量。

去到某個層次，訓練就唔再只係關於hard work，操得甘，因為同層次嘅運動員都一樣操得咁辛苦。更多係在於計畫，取捨同執行嘅細節，而呢個就係體能教練嘅職責。