代償是一個經常被提到的詞語，並且經常被賦予負面嘅意思，並且意思即係動作做得唔正確，先會有代償。
首先，我地需要理解，究竟有無正確嘅動作？係我早前高度推介嘅一本書《How we learn to move》嘅核心思想，就係身體其實並無正確嘅動作，而係會根據自己嘅情況，環境嘅情況同需要完成嘅任務（individual constraints, environment constraints and task constraints），三樣constraints而generate當刻所做嘅動作。
即係話，唔同嘅situation，動作就會有變化，好難可以永遠都根據「正確」嘅動作去做。
代償通常有兩個原因，第一係原本最適合做該功能嘅肌肉關機，需要用後備方案。第二係能力不足，需要其他肌肉幫手。
先講第一點。 當你想去做一個動作，身體就會搵辦法去完成任務。身體並唔知道邊舊肌肉更適合完成該任務，而淨係知道當刻有幾多肌肉可供應用，從而選擇消耗能量最小嘅方法去做。
而大部分肌肉都有多過一個功用，目的就係為左係唔同嘅角度，係某些肌肉失能嘅情況下都有後備方案去完成任務。
至於點解會關機？可能係拮抗肌張力過高，可能係關節移位，原因可以好多。
舉例，要做肱骨水平內收嘅動作，理想情況下就係用胸大肌做，始終最大最有力。但如果核心有問題，胸骨唔可以成為良好嘅穩定點被胸大肌從外往內收縮，身體就需要搵替代方案。而二頭肌、喙肱肌、前三角肌等等都可以成為替代方案，只係肌肉嘅大小、長度同位置都注定佢地唔會係有力嘅肌肉，同去到某個位置就會失去控制，唔能夠幫肱骨繼續內收。
所以，係呢個情況下，需要處理嘅係胸骨穩定性，令到胸大肌可以做野，而唔係奪走本身已經要幫手做野嘅二頭肌，否則肱骨嘅呢個動作會更加無力。
再講第二點。 能力不足都可以再細分。一係阻力太大，唔夠力；二係活動角度大於你能控制嘅角度。相信兩點都唔算太難理解。
係呢個情況，就係不停練，練到穩定地執行到動作為止。
事實上，第一同第二點都係可以同時發生。
要處理第一種情況，我地需要確保身體有足夠多嘅資源被大腦運用，即係日常訓練變化要足夠多，並且盡量運用身體大部分嘅肌肉同時運作。經常被運用，就可以預防失能。大腦可用資源越多，動作變化就越多，動作越細緻。
最緊要唔好令到代償嘅運動方法成為佢唯一嘅運動方法。
要處理第二種情況，就係訓練強度同精準度都要足夠，確保係運用緊我地想佢運用嘅肌肉。
然後，就係擺佢去球場，等身體自行根據當刻嘅身體情況去調配資源。
代償唔可以話係錯嘅，只係身體努力運用所有可運用嘅資源去完成任務嘅體現。想「治療」眼前學員嘅代償，都要確保你提供一個足夠佢應付任務嘅替代方案先可以。否則，代償只會回來，甚至比以往更嚴重。
作為體能教練，需要做嘅就係為學員/運動員提供一副足夠多資源嘅身體，並且係訓練時減少代償，盡量徵召大肌肉，令到係真正比賽時大肌肉可以盡量維持長時間發力，令到唔同角度，不同阻力，不同場景，動作都得以維持。
——————
如果想知多啲關於《How we learn to move》嘅內容，我係Patreon一連寫左幾篇文章，關於全本書嘅分析，歡迎閱讀。
另外都連續寫左一個系列嘅文章講解我對代償嘅睇法，都歡迎大家去閱讀。
Comments