久不久都會有啲文章話train the movement, not the muscles,即係話訓練應該以練動作模式為主,而唔係以練肌肉為主。究竟呢個又係咪真理呢?
同時呢個都係一個值得思考嘅問題,考驗大家知唔知自己訓練嘅目的係咩呢?
呢篇文章會簡單分享下我嘅睇法。
——
如果你嘅訓練目的係增肌減脂、肌肥大、健美的話,呢個問題唔需要思考。
肯定係練肌肉,要每星期確保肌肉得到最大嘅機械張力,並且補充充足的營養,從而達到肌肉生長嘅目的。
但如果你係運動員或者運動愛好者,目標係想活動得更好以應付運動嘅需求,就需要思考一下呢個問題了。
練肌肉可以理解為練該特定組織的強度。
透過不停給予刺激,令到該特定部位嘅肌肉強化,更重要嘅係關節筋腱同軟組織都可以跟住強化。
練動作可以理解為訓練身體活動的能力。
透過進行不同角度的移動,訓練身體不同部位協同發力的能力,亦都即係經常被提及的動力鏈訓練。
例如彈跳訓練、衝刺跑訓練,各種跑步相關嘅drills,藥球投擲,kettlebell動作,炮筒動作等等,都係想「練動作」嘅例子。
透過操控不同的factor,例如阻力的大小、方向、角度、速度等等,去創造不同的外在環境挑戰予運動員的身體,令到身體的動作模式出現變化;同時再透過給予適當口令,改變運動員注意力的投放,去改變運動員應付外在挑戰的能力。
換句話講,係訓練運動員的腦部去操控身體的能力。
例如,要練三關節伸展,就係要髖、膝、腳踝共同伸展先做到,但如果重心太過前傾,就會做唔到好嘅伸展。
咁應該點做?可以將一條木棍擺係頸後方,強逼拉直個身體,或者舉一個5KG嘅plate 過頭,然後做三關節伸展嘅練習,都係為左令身體習慣唔好前傾,令個腦識得係個身體唔前傾嘅情況下發力。
即係話,練肌肉係練肉體;練動作係練個腦。
——
咁既然運動就係動作模式嘅展現,係咪代表應該淨係練動作,唔應該練肉體?
大腦係決定用咩方式去完成動作嘅時候,好重要嘅因素就係取決於 #要進行嘅動作嘅強度 同埋 #身體肌肉嘅強度。假設超過一段時間嘅高強度運動之後,因為疲勞,可能令到某啲部位肌肉能力下降,原先一直使用嘅動作模式就已經用唔到,就會開始出現代償。
換句話說,即係動作開始走樣,身體開始要使用sub-optimal嘅方法黎活動。並且由於肌肉開始變弱,就會從以肌肉黎卸力變成 #直接以軟組織承受衝擊力,受傷風險就會增加。
肌肉越弱,走樣嘅風險就越高。所以,練肌肉就係盡量提升身體肌肉嘅強度,令到身體有更大嘅capacity去應付運動需求。通俗啲嘅講法就係拉長條HP值,等個身體無咁容易出事。
所以係一個完整嘅program,係會同時出現練動作同練肌肉嘅訓練,並且係不同週期會有不同嘅側重點。
兩者並唔係二元對立嘅關係,只係focus係一個面向嘅都唔會係好嘅program安排。
你又知唔知自己嘅program練緊咩呢?
Comments