係街上行嘅時候細心觀察，可能就會見到有運動習慣嘅人，整個人比較直，比較挺，比較有精神；相對地，有啲人就會比較「寒背」，比較無精神。
點解會有呢種分別？可能就係同脊椎延伸的能力有關。
早前係thread 有一段關於pilates 與重量訓練的討論，令到更多人留意兩者的分別。
關於Pilates，其中一個與重量訓練最大的分別係更加強調脊椎延伸嘅效果，係訓練時都會強調「將個人拉直」嘅感覺，咁事實上脊椎延伸係甚麼一回事呢？
----
首先講下脊椎結構
脊椎分成好多節，頸椎7節，胸椎12節，腰椎5節，然後仲有薦椎同尾椎。每一節節椎中間都有一節椎間盤。雖然大家聽到椎間盤之後下一個聯想到的詞語都會係「突出」，但其實椎間盤嘅主要功能係提供支撐以及分散衝擊力。
椎間盤係一塊可以變形嘅結構。朝早啱啱落床嘅時候，椎間盤係處於一個水分飽滿，比較圓潤嘅狀態。然後隨住我地不停嘅活動，受到地心引力影響，身體重量壓落椎間盤，會慢慢將水分排出椎間盤，導致形狀變扁。
然後當晚上訓覺嘅時候，躺平時椎間盤壓力減少，就會慢慢補充水分，然後第二日重新開始新一輪循環。
所以係早上同晚上我地嘅身高係可以有幾cm嘅差距（要度高可以考慮係早上度）。
----
講返正題，上面提到椎間盤嘅主要功能係提供脊椎支撐，如果水分流失過多，會不利於其支撐功能。其次，當身體長期缺乏活動，肌肉力量不足以支撐身體重量的時候，或身體長期維持同一姿勢後，會有機會導致脊椎弧度增加，椎間盤都會長期受壓。
要避免以上嘅事情發生，就需要不停地透過有目的性的運動，透過脊椎活動去刺激脊椎周邊的肌肉，支撐脊椎。
----
能夠達到脊椎延伸效果的活動方式有很多種，以下為大家簡單介紹：
1. 呼吸
假如呼吸功能係良好，肋骨有足夠空間擴張供橫隔膜向下移動的話，每次吸氣同吐氣都能夠令到胸腔與腹腔有大幅度的擴張，從而帶動脊椎有一定的延伸同壓縮，造到肌肉活化與脊椎減壓的效果。
其次，功能良好的呼吸能夠協助增加與維持腹內壓，繼而增加脊椎穩定性。
2. 脊椎多角度活動
脊椎本身能夠多角度活動，透過脊椎的多角度活動，能夠幫助脊椎離開本身受壓的姿勢，使壓力由其他部位分擔，做到拉長與延伸的效果。
連結脊椎的肌肉除左有垂直的豎脊肌與多裂肌之外，還有斜向連結的斜方肌、菱形肌、背闊肌等。當你經常維持係同一姿勢時，只會令到豎脊肌過度用力，而多做額狀面與水平面動作就能夠激活上面提到的斜向肌肉，減輕椎間盤所受的縱向壓力。
3. 多做下肢移動訓練
除左脊椎本身的移動外，當下肢發力移動身體進行彈跳或多角度移動等移動中心的動作時，力量會透過骨盆傳送到脊椎，同樣誘發脊椎作多角度移動，繼而協助脊椎做到延伸減壓的效果。
跑步、彈跳、投擲動作等，都能夠透過下肢的發力做到活動脊椎的效果。
----
如果想望落更高，更挺，重點就係要多活動自己的脊椎，儘量活化脊椎附近的肌肉，並且控制肌肉做各方向的拉長縮短動作，就能夠達到脊椎延伸的效果，使身材看起來更加直與挺，比起一味的挺胸收腹更有效果。
最後補充一點，每一種訓練方式都有各自嘅優點，每一種方式都唔一定係非此即彼，只要你清楚了解自己嘅需要，就可以mix and match出自己的訓練方法。
有興趣預約的朋友，可以填寫google form 預約試一試！
Comments