有感而發，隨筆一篇。
開page至今都有3年，寫patreon至今超過年半。對好多人黎講，中學或大學畢業之後就唔會在執筆寫文章，但我係對上三年寫得多過以往二十幾年加埋，點解我堅持，或者話享受寫文章呢？
幫助理解知識
學習係input知識嘅過程，但要考量自己係咪真係識，就需要嘗試output 出去。要寫得出一篇通順嘅文章需要釐清知識背後嘅邏輯，再用自己嘅文字寫出黎。
另外，公開自己嘅文章代表需要為自己嘅文字負責，係文章公開之前我都會review幾次，確保（係自己當刻嘅知識水平睇）係正確無誤，先會發布。
一次又一次思考嘅過程其實都係幫助自己釐清同理解概念嘅機會。
可能好多人會擔心無內容好寫，但其實只要不停學習，不停吸收知識，不停反思，可寫嘅題材只會源源不絕。
personal branding
我嘅文章就係我個人能力同想法嘅projection，亦都即係我嘅personal branding，我視之為我嘅一張卡片。有啲人會用圖片，有啲人會用video，而我個人會選擇用文字。
我亦相信唔少人係因為睇左我嘅文章，初步了解我嘅能力，再黎報名我嘅課程/工作坊/1對1訓練/patreon。
分享重要嘅知識
資訊爆炸嘅年代，fb/ig/youtube有非常多嘅健身或wellness相關資訊。有啲非常好，有啲睇到我搖頭。我都希望我個人嘅平台能夠成為一個大家覺得credible嘅資訊來源，分享我認為重要同我相信嘅資訊。成為專業嘅教練有好多重要嘅概念需要釐清、理解同學習，我係持續學習嘅同時都樂意向各位同行分享心得。
寫作速度越黎越快
最後一個原因，都頗為重要。就係當經常運用寫作呢個技能之後，文章係會越寫越快。當文章越寫越快，越唔佔用自己嘅時間，就越願意寫，所以就會繼續願意寫落去。
以上呢篇隨筆我用左15分鐘左右寫好，諗配咩圖仲難 。
鼓勵有心嘅同行都可以持續寫文章，令行內有更多credible嘅中文資訊來源。
亦都歡迎大家 like share save 我嘅文章，向更多人推介我嘅文字。
Kommentare