今日略略講下髖關節嘅活動度。
我們的關節可以進行3個平面的活動，分別是矢狀面、冠狀面與水平面。
如果要分重要性的話，矢狀面最重要，其次是冠狀面，最後是水平面。
始終人大部分時間都是向前移動，矢狀面的活動度與穩定性決定了我們向前移動的效率。
髖關節係一個球窩關節，股骨頂係球型設計，塞入去盤骨底嘅兩個凹位，再透過韌帶、肌肉、身體重量去維持穩定。
正正係因為呢個關節嘅設計，令到髖關節係三個平面都可以活動得好多嘅關節。
髖屈：100度
髖伸：20度
髖外展：45度
髖內收：30度
髖內旋：40度
髖外旋：60度
以上係供參考嘅髖關節活動度數據，人人有一定嘅差異，但應該唔會差太遠。
---------------------------------------------------------------------------------------------------------------------------
髖關節雖然活動度大，但要支撐身體重量，所以亦都有非常多嘅韌帶去維持穩定性，防止髖關節移位。
如果我地過度去追求更多嘅髖關節活動度的話，就有機會拉鬆髖關節韌帶，失去穩定性嘅情況下，身體就會令到肌肉收緊去作為保護機制，所以就會越練越緊。
所以除左練活動度之外，仲要練動作嘅控制。確保身體有活動度之餘，每一個角度都有穩定嘅控制。始終對於髖關節黎講，最重要嘅唔係開放鏈下嘅動作幅度，而係係閉鎖鍊，即係承重時期能不能夠提供穩定性。
上半身需要穩定嘅下半身先可以正常運作。
---------------------------------------------------------------------------------------------------------------------------
髖關節嘅內旋能力非常重要，當髖關節內旋時，可以令到下肢最強臀部肌肉處於離心收縮狀態，幫助吸收著地時嘅衝擊力。無論係急停轉向定係跳起著地，都需要髖關節內旋嘅能力先可以安全地做到。如果內旋能力不夠好就容易變左膝關節受力。
但正如上面所講，除左練開放鏈嘅內旋動作外，都要訓練真係承受體重時嘅髖關節內旋能力，始終任何開放鏈動作嘅衝擊力都及不上速度加體重嘅力量。
深蹲、單腳硬拉、分腿蹲等等動作，都需要髖關節嘅三平面動作。大家以為單純係上落嘅矢狀面動作，但其實同時都包含內收外展以及內外旋。係負重狀態下保持動作嘅精準度，其實係非常好嘅髖關節穩定性練習。
有穩定性，維持到盤骨穩定，就會有髖關節活動度。
雖然因為生理結構嘅原因，我地會有最理想嘅站距，但同時都要訓練自己係不同角度受力嘅能力。調整下前後腳嘅距離、重心嘅擺位、重量嘅位置，都會影響髖關節嘅發力。
所以係訓練時，謹記 #要訓練身體係不同角度發力同受力嘅能力，先係理想嘅訓練方法，呢個亦都係我理解嘅關節活動度訓練。
關節活動度唔係越多越好，但關節控制能力肯定係越強越好。
Comments