淺談髖屈肌

寫完內收外展肌肉，就不妨寫下髖屈髖伸肌肉，今日先寫髖屈肌肉。

基本上，係股骨前方，連結盤骨與股骨的肌肉都可以進行髖屈，即係將股骨同盤骨前側距離縮短嘅動作。

-

開放鏈動作就係盤骨穩定，股骨升起，例如坐低做，或者重心完全放係一隻腳，另一隻腳升起。

閉鎖鏈就係股骨穩定，盤骨折落去，例如deadlift & single leg deadlift嘅時候。

-

髖屈肌係步態上非常重要。每一步抬腳上前都需要髖屈肌嘅參與，相信大家應該想像唔到抬唔到腳嘅時候人體可以點樣步行，可能要夾硬係側邊搬隻腳上前。

身體都唔想比呢樣嘢發生，所以有好多肌肉都可以進行髖屈，確保無論股骨係不同角度都可以做到抬腳上前。

可以做到髖屈嘅肌肉包括： 髂肌 (illacus) 股直肌 (rectus femoris) 闊筋膜張肌 (tensor fascia latae) 縫匠肌 (sartorius) 腰大肌 (psoas) 恥骨肌 (pectineus) 內收短肌 (adductor brevis) 內收長肌 (adductor longus)

從股骨內側到外側，全方位覆蓋股骨，就係為左將股骨帶上前。

當然，肌肉角度越直，就越做得好髖屈功能，所以髂肌同股直肌係最好嘅髖屈肌肉。其他都係輔助形式，而且佢哋自己本身都有其他平面嘅功能，如果幫手做左髖屈，自己本身嘅功能就會有問題，亦都會有代償出現。

-

係閉鎖鏈理解，能夠有效發力嘅髖屈肌可以令到髖伸肌肉，即係臀大肌同埋大腿後肌群，進行離心收縮。髖伸肌肉進行離心收縮可以幫助我地係步行/跑/跳著地時進行減速功能，減低衝擊力。另外，髖伸肌肉嘅向心收縮能夠幫助我地推進，要做到有力嘅向心收縮，就首先要做到有力嘅離心收縮。

點樣先可以係訓練時確保用到髂肌同股直肌？

好似我上面所講，當股骨係唔同角度時會有唔同肌肉參與，咁當股骨同盤骨對齊嘅時候，就最適合垂直嘅肌肉參與。

對齊即係髕骨（菠蘿蓋）同髂前上棘(ASIS，即係盤骨前方)對齊，以及髕骨向天或者向正前方嘅時候。

如果係開放鏈，企係度嘅時候，就要依靠重心腳發力穩定盤骨，確保係抬腿時盤骨唔會左右搖擺以及旋轉。

如果係閉鎖鏈的話，就需要確保重心平均分佈係重心腳嘅腳底三點，並且係盤骨向下反落去嘅時候唔會有旋轉以及左右搖擺，感受到髖伸肌群嘅拉扯，就係理想情況啦。

另外，如果佢無論點都擺唔到呢個對齊嘅情況發力，大家都可以合理預計佢用做其他肌肉代償，嗰隻腳嘅功能點都會有影響。不妨檢查下上面我所講嘅肌肉有無張力過高，放鬆之後再做訓練，睇下有無好轉。

-

關於髖屈嘅訓練動作，都係推介deadlift，然後再進階去single leg deadlift。如果做得好的話，雙腳起跳單腳落地，向上或向前均可，訓練單腳卸力嘅能力，都係好嘅練習。

動作唔洗複雜，但動作質素做得好，感受到應該發力嘅肌肉發力就最緊要。

髖屈肌就講到呢度，之後再講髖伸肌。