早前係story 問左大家有咩想睇嘅文章題材，然後有人表示想了解下訓練安排，我可以稍微分享下睇法。
訓練安排可以分幾個層次去理解。
首先以月計嘅安排，例如3個月後有比賽，咁可能係每3-4個星期一個週期，每個週期有不同嘅訓練重點。
唔同嘅門派有唔同嘅做法，我用嘅做法係頭一個phase係肌肥大週期，然後下一個phase係大重量週期 ，再下一個phase係爆發力週期。
然後每一個週期做嘅野會有唔同，例如肌肥大週期訓練強度中等，但訓練量比較大，著重全身強化。
大重量週期就會選1-2個主要動作黎加重，做3-5RM嘅重量。由於大重量訓練動作對神經系統負荷比較大，只會再配合2-3個其他部位嘅動作黎訓練，訓練量亦都會較少。
爆發力週期，就會由大重量動作轉變為爆發力動作。至於係strength-speed 動作定係speed-strength 動作，都可以係視乎運動員需求同能力而定。
同時，除左講要做邊種動作，仲要講運動員做到邊種動作。運動員嘅能力同教練嘅教學能力同樣會有影響。
-
講完以月計嘅安排，有時仲會講每個星期入面嘅安排。
呢個需要視乎專項訓練強度嘅安排同埋週末有無比賽。
一般會視乎專項訓練強度再作，同埋大重量訓練會同週末比賽相隔比較遠。
所以有可能星期一或二係大重量，星期四或五係中重量諸如此類。
具體情況需要具體處理，非常之視乎運動員對訓練嘅反應而調整。
如果訓練量本身低的話，呢樣野唔係你最需要考慮嘅事。
-
之後就係每個訓練session入面嘅安排。
最基本原則就係每次將最消耗神經系統嘅訓練擺最頭（大重量、爆發力），令到身體可以係最fresh嘅狀態去做動作。
然後先去視乎自己嘅弱點去搭配輔助訓練動作，或者係進行全身性嘅動力鏈訓練動作。
要了解自己嘅弱點係咩，就需要先係planning階段做一次分析，先知道點樣安排動作。
最後，就係盡可能均衡發展，全身肌肉都要練到，最簡單，就係一日push 一日pull。
-
最後講一啲大原則。
如果你一星期只係練一日的話，基本上唔洗講咩週期性訓練，搵一個最能夠改善你弱點嘅動作，然後progressive overload。
唔係練得越多越好，重點係recover得切，而且重量訓練唔好影響專項訓練。
program幾好都好，運動員唔跟足，平時休息唔夠，食得唔夠，都係無用。Planning 可以調整，但運動員唔跟住做就無意思。
programming唔需要太複雜，運動員識做同做得啱先最重要，然後慢慢加重。
訓練強度好重要，同時訓練量唔好太多，具體可以參考上一篇文。
Comments