相信有運動習慣嘅朋友都應該係唔同場合聽過「心、技、體」呢三個字，適逢最近睇左好多非常精彩嘅體育比賽，令我想講一講對呢三個字嘅睇法。
兩個星期前，相當於羽毛球界世界杯嘅男女子團體錦標賽湯姆斯杯（Thomas Cup）同埋優霸盃（Uber Cup）係泰國上演。認識我本人嘅朋友都知我本身係羽毛球愛好者，所以當時我差不多日日都睇波咁滯。
羽毛球團體賽會分為一、二、三單同埋一、二雙，而世界排名較高嘅球員必須要先出場。所以當時各個國家世界排名最高嘅球手都會互相對戰，變左好多係大賽4強、決賽先會出現嘅高水平較量會連番出現。
-
要數到羽毛球界最多話題嘅球員，就需要數到日本嘅桃田賢斗，係2019年，勇奪世錦賽冠軍，單季參加13個比賽得到11個冠軍，超越李宗偉所保持嘅單季10冠紀錄，風頭一時無兩。
當每個人都睇好2020年東京奧運桃田賢斗會係祖國得到男子單打金牌，先係2020年1月遇到車禍，需要做手術，然後因為新冠肺炎，全球停擺，奧運順延一年。甚至係2021年頭確診新冠肺炎，可謂諸事不順。
之後，就係每一個羽毛球迷都知道嘅事，桃田係奧運分組賽出局，係奧運後嘅比賽都只係得到一個比賽冠軍。
-
點解講桃田賢斗會講起「心、技、體」？係出發湯姆斯杯前，桃田承認出現信心問題，指出狀態只有5成。結果，係同各國一單嘅對碰入面，接連輸波。甚至係對上最近狀態同信心處於頂點嘅馬來西亞頭號男單選手李梓嘉時，毫無還手之力地輸波，更加令人明顯感受到信心不足。
如果單獨觀察，桃田嘅運動能力依然頂尖，就算有所下降，相信幅度都有限。技術依然細膩，稱佢為現役男單技術最好嘅球員之一相信都無人質疑。
但係同各國男單嘅對碰之下，信心不足嘅桃田明顯係場上不能夠用佢擅長嘅技術同節奏去限制對手，從面部表情亦都睇得出佢無能為力，同2019年時嘅精神面貌形成強烈對比。
-
一直都認同高水平運動競技其實就係「心、技、體」嘅綜合體現。
心，泛指心理質素，爭勝心，內在動力等等
技，泛指運動相關的技戰術
體，泛指身體質素
呢三個因素互相影響，如果想將運動表現提升到高水平，三樣都缺一不可。
要留意嘅係，透過健身室嘅訓練，只能夠改善身體質素，令到大家係場上更有對抗性，或者能夠有更好嘅身體去展現技術，但身體質素都只係三者之一。假如你身體質素非常好，可能會有局部優勢，但係要影響勝負，依然係三個因素綜合體現。
高水平運動員會花大量時間去磨練運動嘅技術，務求係唔同場合都可以穩定地運用自己嘅技術。另外，「技」仲包含戰術嘅元素，仲包含對自己嘅運動嘅理解。理解得越透切，就越可以係適當時候採取適當嘅策略去應對。
-
另外，我接觸過嘅高水平運動員都有一股提升自己水平嘅執念。執念嘅來源可能不同，可能係好似c 朗拿度咁，各種榮譽都攞過，但依然係因為高水平嘅自我要求去求進步；亦都可能係為左脫貧，因為金錢嘅誘因而去求勝；或者係為左一個必須達到嘅目標而去努力。
無論係內在動力定係外在動力推動，定係兩者共同推動，都無所謂，重點係呢個動力要足夠強，強到足而對抗過程中會面對嘅挫折。有啲人甚至會用飢渴、嗜血等等詞語去形容對勝利嘅追求。
雖然好似講緊心靈雞湯，但我覺得只係事實陳述。
執念唔需要係好dramatic嘅事情，可以簡單理解為為左達成目標而做出調整。做多啲會幫助達成目標嘅野，例如有目的地訓練，多休息，紀錄同思考訓練；同時減少會影響目標嘅事，例如飲酒、暴飲暴食、缺席訓練等等。再將以上嘅調整重複做，時間就會企係你嗰邊。
當然，影響心理狀態嘅因素仲有好多，尋求運動心理學家嘅協助、進行呼吸練習、禪修、改變訓練內容等等，都可能可以幫助，實際都需要一定嘅測試先可以做到。
-
寫呢篇文章主要係想令大家明白到，做gym 做到好fit，身形好好，對於運動表現嘅幫助其實未必好大。除左身體之外，仲需要花時間磨練技術，仲需要動力去支持自己捱過呢段磨練身體同技術嘅過程。
除非你天賦好好，年少成名，否則增取成績嘅過程就好似修行一樣，需要大量嘅付出先會有收穫。
香港絕對唔算係一個重視運動員嘅地方，即使過左東京奧運後有所改善，運動員嘅資源依然非常少，要係爭取運動成績嘅同時可以維持生計亦都絕對唔容易。
係香港，如果想成為有成績嘅職業運動員，鬥心可能更加重要。有鬥心，先可以增取係有限嘅資源去訓練，增取最好嘅成果。
-
如果你睇到呢度，依然想做職業運動員，又自認為有鬥心同決心想提升的話，歡迎聯絡我，樂意幫助你提升水準。
Comments