講到復健訓練，大家應該都會聯想到阻力帶做肩內外旋訓練，或者用細阻力帶綁係膝關節上方然後膝頭內外轉，或者用器械做膝關節屈曲、伸展動作。
以上所講嘅復健訓練都係有用嘅復健訓練，但係咪不停做以上嘅動作就可以康復，可以落場運動同比賽？
假設打籃球對膝關節肌肉要求係80-100，然後當你受傷之後，膝關節肌肉能力跌到30。咁要安全地打波，最好做法就係將膝關節肌肉能力提升到100或以上，先係理想嘅情況。如果膝關節能力只係上升到60就去打波，咁可能可以依靠其他部位嘅代償去做到動作，但長遠一定有風險。
———
訓練有一個重要原則，叫做漸進超負荷（progressive overload），即係給予身體接近極限或者稍微超過極限嘅阻力。然後當身體有足夠嘅營養吸收之後，身體就會發展出更強韌嘅肌肉同軟組織，令到身體係再遇到同樣嘅阻力時候可以控制得到。
然後就係不停重複以上嘅情況，身體理論上就會越來越強。
假設膝關節受傷，嗰個部位就會較為脆弱，可承受嘅阻力都相應較低。但係經過一段時間嘅治療之後，即使起點較低，但依然適用於上面所講嘅漸進超負荷原則，慢慢加大阻力，組織嘅強度都會相應提升。
然後當組織嘅強度高於日常運動需要嘅強度的時候，就自然無咁容易受傷。
———
第一段所講嘅復健動作並非有問題，但阻力帶可以給予組織嘅阻力有限，可以超負荷嘅空間都有限。如果整個復健週期都只係用阻力帶做動作的話，就未必足以令組織強化到足夠保護嘅情況。
而所謂可以做到漸進超負荷嘅動作，其實即係多關節動作（compound movement），即係大家經常見到人做嘅深蹲、硬拉、分腿蹲等等。
做多關節動作有兩個好處：
1. 令到身體習慣髖關節同膝關節嘅協調發力，較貼近實際情況
2. 有髖關節幫助下可以承受更大阻力，有更大超負荷空間
所以講到復健訓練，唔同時期會有唔同嘅訓練面向。初期可能會用強度較輕嘅動作，以恢復關節控制能力為主。但到中後期，接近重返賽場嘅時候，都需要透過大重量訓練強化受傷部位，先係安全嘅做法。
Comentarios