係媒體報導上，運動員成績與「努力訓練」基本上畫上等號，令人感覺運動員得到成績就是因為努力訓練，而沒有得到好成績就是不夠努力訓練。
但思考一下，努力訓練所講嘅係咩？
係咪單純代表你所留嘅汗水嘅多少？
你留係訓練地方嘅時間多少？
你做嘅組數嘅多少？
係咪以上所講嘅三樣野越多，就越會等於好成績？
相信大部分達到一定水平嘅運動員，都係「肯練」嘅運動員，都係教練話練咩就練咩，盡力跟隨教練安排嘅訓練計畫。
如果話練得夠多就可以攞冠軍，相信絕對有運動員願意訓係訓練場上面，然後一起身就練。
但實情唔係咁樣。
訓練效果嘅好壞，除左取決於肉體上嘅input，仲有思維上嘅input。
簡單啲講，
你知唔知你練嘅野有咩用？
點樣同你進行緊嘅運動掛鉤？
點解要進行呢個練習？
想提升咩身體質素？
當你了解之後，就唔會做左似是而非嘅動作出黎。每一次嘅訓練都有目標，然後針對目標再去執行動作，去令身體提升。
例如做back squat唔係為左做back squat，而係為左提升下肢速度/力量/核心等等，所以如果動作做唔好，核心唔穩定，用腰夾埋頂上黎唔係下肢用力，咁唔做好過做。
再舉多個例子，例如program 寫single leg box jump訓練，雖然表面上都係就咁跳上個箱，但訓練細節可以有分類。
如果想練tendon strength，就應該係用countermovement 嘅方式彈上去。
如果想練triple extension 嘅能力，就可能會負重，同時確保做好髖關節嘅完整伸展，做到騰空。
如果想練發力速度，就要用最快速度向上跳起。
教練有思考訓練目標，就識得給予較適合嘅訓練指示。 運動員了解訓練目標，就知道點解要咁做，同做錯嘅時候識得自我糾正。
細節決定成敗，唔識得按照訓練目的，調整訓練細節，咁流幾多汗水都唔會有用。
Workout嘅目的係流汗，活動身體。
Training 嘅目的係為左學習，為左令自己嘅身體質素同控制能力進步。
你做緊嘅係workout 定係training？
————— 如果想嘗試有目的，針對性地訓練，不妨聯絡我，提供1 on 1 & 1 on 2 訓練。
Comments