《你了解爆發力訓練嗎？》

運動員訓練同普通人係健身室做嘅阻力訓練有咩分別？其中一個最大嘅分別就係運動員需要做爆發力訓練。

運動員除左要大力之外，因為球場上不停變化嘅情況，仲會有發力時間嘅限制。 爆發力即係要係：

1. 一個特定時間段內

2. 發出最大嘅力量

所以除左力量要大之外，發力嘅頻率都係需要考慮嘅因素。 無錯，除左發大啲嘅力之外，發力發得更快都係可以練，而且需要針對性嘅訓練。而呢個就係運動員訓練嘅特點。

另外，好多運動需要不停變向，即係需要向不同方向發力。所以除左發得大力同埋發得快之外，運動員識得控制發力嘅方向都係重要嘅因素。

又另外，講到發力嘅大小，當然係用大肌肉好過用小肌肉。即係下肢發力時用到臀大肌發力點都好過淨係用小腿肌肉，上肢發力時用到腹外斜肌同背肌發力點都好過淨係用手臂肌肉發力。所以發力嘅先後次序同肌肉控制就變得好重要。

我地除左要發力發得大力同快外，仲要留意究竟係邊個肌肉發力，能唔能夠充分運用大肌肉發力，用大肌肉帶小肌肉就變左關鍵。

又又另外，為左發出最大力量，其實身體需要調動最多嘅肌肉參與。無論係幫手發力，定係穩定關節等佢地唔好阻礙發力，都係需要控制。所以，爆發力訓練其實都需要應用到全身嘅肌肉。

所以總結一下，爆發力訓練就係：

1. 極短時間內

2. 控制身體大部分肌肉

3. 按順序

4. 向目標方向

5. 發出最大力量

講到呢度，大家應該想像到點解爆發力訓練係需要針對性嘅訓練。如期話佢係力量訓練，不如話佢係一個 #神經系統嘅訓練 更為貼切。訓練嘅目的就係令到神經系統更習慣呢種運用全身肌肉嘅發力模式，並且令到運動員係運動場上都可以應用到處理。

了解原理，就會明白點樣練。 常見嘅訓練動作，例如olympic weightlifting嘅動作，hex bar jump，藥球投擲，各種彈跳訓練等等，都係想達成上面所講嘅訓練目的。 無論你係想增強爆發力嘅運動員定係想教運動員嘅教練，了解爆發力訓練嘅本質都非常重要。

如果想知道更多關於爆發力嘅知識，我早前係patreon一連寫左3篇文章，包含發力原則、測量原則、programming原則同埋program 範例都有，相信對於大家理解爆發力訓練都有幫助，有心想知道嘅，歡迎去patreon睇下啦。 如果大家對運動表現有追求，想增強呢方面嘅能力的話，都歡迎搵我開始進行訓練！