係運動世界，好多人推崇一種硬漢式嘅訓練模式。訓練要夠狠，運動員捱過左地獄式訓練就會夠堅強，就可以係比賽中有強嘅心理質素，然後贏波。呢本書開宗名義，講呢個係對「堅強toughness」嘅錯誤理解，並且從科學嘅角度講點樣先可以達至真正嘅堅強，亦都即係穩定嘅心理質素。
要培養堅強嘅心理質素，總共有4個支柱。
1. 面對現實
呢個並唔係大家一般意義上所講，叫大家悲觀地接受自己不足嘅意思。相反，係一種實際嘅做法。現實包含兩個面向，第一係要誠實面對你眼前需要完成嘅挑戰，全面地分析，了解困難之處。第二係要誠實面對自己，從分了解自己嘅能力，同埋問自己有無能力，用咩方法去完成挑戰。
通常最容易緊張嘅時候，就係出現計畫外嘅事情，或者出現自己未能夠有效處理嘅事情，就會緊張。所以，全面地面對現實有佢嘅必要性。
作者再引申出一個概念：自信VS自尊
好多人會將兩者調換。自尊係一種社交上嘅概念，取決於外人點樣睇自己；自信則係一種由內到外嘅氣質，取決於過往曾經完成嘅事情。一個可以扮出黎，一個就係從理據同經驗引申出黎。
confidence sits on experience.
實際上可以點樣做呢？幾個方法：
Lower the bar, raise the floor：Bar 即係你想達到嘅目標， floor 即係你現有嘅能力，亦都即係你訓練時能夠做到嘅野。簡單講，唔係訂不切實際嘅目標，而係做好訓練，然後係比賽做番日常訓練嘅水平。
Embrace who you are：面對自己，誠實了解自己真正嘅長處同短處。
Trust your training：同第一點一樣，當你係訓練時面對過差不多嘅情況，實際發生時你就識得處理，實際操作即係有咩不足就要練咩不足。
Develop a quiet ego：放低自我，唔好一有唔理想嘅事情發生就立刻否認現實，而係做evaluation。
2. 聆聽自己嘅身體
相信大家都認同「堅強」係情緒嘅一種，咁要理解堅強，理解情緒係重要嘅一環。
情緒係點樣黎？情緒唔單只係一種「回應」式嘅行為，同時都可以係一種「預計」式嘅行為。源於我地點樣去理解事情同事情背景，會令到我地嘅emotion 有所改變。
情緒同行為互相緊扣。情緒可以令我地身體「想」做某啲行為，但同時唔代表我地要立刻進行某種行為。emotions lead to, but do not control our action。
點樣可以更好地避免被情緒控制身體活動？首先最重要嘅係熟悉自己嘅情緒。
當情緒反應出現的時候，嘗試更深入地感受。究竟係開心、憤怒、悲傷、激動、係咩原因導致情緒反應嘅出現？唔同嘅情緒可能帶來差唔多嘅身體反應，但越能夠細緻地分辨會對於我地點樣回應會有幫助。
如果有睇過迪士尼經典卡通 Inside Out的話，就應該知道腦裡面係有不同嘅聲音，不同嘅情緒會嘗試控制你嘅身體去執行不同嘅反應。我地唔係單單係要否定同迴避呢啲聲音，相反，係可以聆聽呢啲聲音嘅同時可以「贏」過呢啲聲音嘅爭論。
其中一個方法就係self-talk，高水平運動員都會係比賽途中自己同自己講野，去激勵自己。仲有一個有趣嘅方法就係將自己同內在嘅自己「分割開」，係比賽時唔係講「頂住呀！做到呀！」，而係加上自己嘅全名/花名，「XXX，你頂住呀！做到架！」，甚至乎可以係self talk時加入更細緻嘅動作、戰術指示，好似多左一個參謀係身邊提點自己一樣，更加可以令到自己頭腦清醒。
3. 回應而唔係反應
面對負面情緒，好多人會選擇迴避，刻意壓抑所有負面情緒，彷彿唔理就唔會出現。但其實一個比較好嘅處理方法，就係上面提過嘅理解同感受情緒，將情緒同行動嘅空間拉大，係從分感受情緒之後先去選擇點樣會回應。
係實際情況下比較難做到，但其實可以有比較簡單嘅訓練方法，就係冥想。冥想唔一定要坐定係度，跑步，散步一樣係一個冥想方法，比自己嘅注意力慢慢收入去自己內心，感受自己腦海入面不同嘅思想，然後感受身體有咩反應。即使身體有咩反應，都唔好改變你實際正在做緊嘅動作，呢個就係一個簡單嘅「創造空間」嘅方法。
4. 超越不適
無論係訓練定係其他行業都係一樣，我地要改變，要進步，就需要經歷一定嘅挑戰，就需要經歷一定嘅不適。當痛苦係無可避免嘅時候，我地可以選擇點樣面對痛苦。
其中一個方法就係搵一個可以支持你挑戰自己嘅團體。人係群體動物，需要同其他人交流，需要有sense of belonging。一個supportive嘅團體可以令到自己願意去付出100%去挑戰自己。
另一個方法就係為自己嘅不適搵一個合適嘅原因，簡單黎講既係搵一個自己由心而發想做的事。當驅動力係由內心出發而唔係因為外在條件的時候，好多不適都可以捱過去。
—
總結黎講，係一本值得一睇嘅書。係運動界，老一輩嘅教練都係盲目地相信hard work，相信捱過艱苦嘅訓練就可以成為「硬淨」嘅運動員，好大可能就係因為佢地當年就係咁樣捱過黎。但科學話比我地知，人嘅情緒波動並唔係簡單掩蓋，迴避就可以解決。
唔同嘅書都有指出過同一點，唔同情緒，包括正面同負面嘅情緒，會同時存在，同時影響我地嘅行為。黎得快，去得都快。我地要做嘅係接受人有不同嘅情緒，熟悉我地嘅情緒，同埋學識點樣回應我地嘅情緒。
另外，作為教練，我地都要理解運動員有自己嘅情緒。適當時候識得引導運動員嘅情緒，賦予佢地控制情緒同行為嘅主導權，係培養獨立嘅運動員必須嘅一步。
Comments